Dos miliciano (militiamen) el ya muri y dos otro ya iri na explosion de un improvisado bomba mientras ta ase sila enbuscada con un grupo de bandido Abu Sayyaf na provincia del Basilan.
El Basilan Police Provincial Office (BPPO) ya identifica con el dos fatalidad como canda Rit Iklaman, 41, y si Ligaya Ajanal, 36, años el edad y mga residentes del Barangays Guiong y Lukitton, respetivamente, na municipio de Sumisip provincia de Basilan.
Con el dos irido ya conose como canda Musab Balaman, 37, un miliciano de Barangay Baiwas, Sumisip, y Bibot Sabtalan, un informante y residente de Barangay Guiong.
Asegun con el BPPO, el explosion ya ocuri mga alas 12:30 del Lunes tarde na Sitio Bato Piat, Barangay Limbocandis, Sumisip.
Base na investigacion, el mga victima ta conduci un operacion de aplicacion de ley relatao sobre el presencia del mga bandido Abu Sayyaf que ta encabesa si Tawakkal Bayali cuando ya puede sila trompesa con un improvisado bomba que ya usa como trampa na camino desde el Sitio Bato Piat para na Sitio Irilis, Barangay Limbocandis.
Por causa de mafuersa explosion, enseguidas ya muri canda Iklaman y Ajanal mientras ya iri canda Balaman y Sabtalan.
Ta cre mga autoridad que si Bayali relatao con el defunto lider del grupo Abu Sayyaf, si Pasil Bayali, quien ya muri por causa del mga irida que ya sufri le cuando ya puede captura el fuersa militar con su campo na Sitio Lobloban, Barangay Guiong, Sumisip del Junio 3, este año.
El mga autoridad ta continua busca con el grupo de Tawakkal na municipio de Sumisip y sercanos lugar. (B. Garcia, photo courtesy of Ronda del Basilan)