Dos miembros de sindicato de droga ilegal el ya muri mientras valor de P340,000 shabu el ya confisca siguiendo el un tirahan na provincia de Tawi-Tawi, asegun con Philippine Drug Enforcement Agency (PDEA) del Miercoles.
El PDEA na Bangsamoro Autonomous Region in Muslim Mindanao (BARMM) ya habla el tirahan ya ocuri del Lunes na Isla de Bunabunaan, Barangay Libayuran, Panglima Sugala, Tawi-Tawi.
El PDEA-BARMM ya identifica con el dos muerto miembros de sindicato de droga ilegal como canda Sala Ahmad, conocido tamen como si Akmad Usman, y si Gory Usman.
Asegun con el PDEA-BARMM, ya socede el tirahan cuando canda Ahmad y Usman ya tira de ila mga pusil despues de gole’r cay ya hace sila transaccion de droga ilegal con mga operativas del gobierno.
El PDEA-BARMM ya habla ya iri canda Ahmad y Usman cuando el combinao operativas del PDEA, policia, y militar ya tira tamen con el mga suspechao que ya resulta na tirahan.
El PDEA ya habla, con Ahmad y Usman enseguidas ya lleva na hospital, pero ya declara canila muerto el doctor apenas ya llega na facilidad medical.
El otro mga compañeros del dos muerto suspechao ya puede escapa llevando con el dinero de compra busto.
Tiene del mga operativas del gobierno ya iri tamen siendo ya sumi de ila vinta con maquina amediante el tirahan, pero nohay mas elabora el PDEA-BARMM.
Con el mga irido operativas ya lleva na hospital y ta esta sila ahora na buen condicion.
El PDEA-BARMM ya habla, ya recubri na posesion de dos muerto suspechao 50 gramos de shabu enpaquetao na un sobrecito plastico que tiene el valor de P340,000, dos calibre .45 pistola con mga bala, diferente clase de parafernales de droga ilegal, un pitaka, sinco bandolier, un daan uniforme de pulis, y un cajon de yero.
El operacion contra droga ilegal ya conduci mga autoridad cuando ya puede sila confirma el presencia del mga suspechao na isla de Bunabunaan, Barangay Libayuran, Panglima Sugala. (B. Garcia)