Dos miembros del Bangsamoro Islamic Freedom Fighters (BIFF) el ya rendi con mga autoridad na provincia del Maguindanao del Norte, asegun con el policia del Lunes.
El policia ya identifica con dos rendidores BIFF como canda alias Subo y alias Boy, quien ya rendi del Viernes con mga autoridad na Daan Capitolio na Barangay Simuay, Sultan Kudarat, Maguindanao del Norte.
Asegun con el policia, el dos rendidores mga siguidores del Faccion de Karialan del BIFF, quien base y operante na mga municipios de Shariff Aguak, Pagatin (Datu Saudi Ampatuan), Mamasapano y Shariff Saydona, conocido como mga lugar de conflicto.
Notorioso el mencionao cuatro municipios por causa na historia del mga encuentro armadas y actividades de insurgente contra con el fuerzas de gobierno.
Asegun con el policia, el mga rendidores BIFF ya entrega un rifle carbine y un Rocket Propelled Grenade (RPG) con mga bala para dale mira cay ya rendi sila con buen fe.
Asegun con el policia, el dos miembros del BIFF ya rendi por medio de esfuerzos incansables del mga autoridad, quien ya puede convinci canila para abandona del ila peleya aramada y reintegra na sociedad como mga ciudadanos respetuosos de ley.
Con el dos rendidores BIFF y mga armas de fuego que ya entrega sila ya pone bajo’l custodia del Maguindanao del Norte Provincial Police Office para el documentacion, propio disposicion, y para enrola canila na programa del gobierno nombrao como el Enhanced Comprehensive Local Integration Program, o E-CLIP.
El mga personajes del 41st Special Action Company del 4th Special Forces Battalion ya proporciona suporta tactical con el policia na Maguindanao del Norte durante el rendida del dos miembros del Faccion de Karialan del BIFF. (B. Garcia)