Ya anuncia el 11th Infantry Division (11ID) cay dos mga municipios insulares (island municipalities) na provincia del Sulu el declarao ya librao desde’l influencia del grupo Abu Sayyaf.
Declarao librao desde’l influencia del grupo Abu Sayyaf amo el mga municipios insulares del Pandami y Saisi, clasificao como aka-cuatro y segunda clase de municipio na Sulu, respectivamente.
Asegun con el 11ID cay con el mga municipio de Pandami y Siasi ya declara librao desde’l grupo Abu Sayyaf por medio de resolucion ya aprova del Sabado ya pasa el “Municipal Task Force in Ending Local Armed Conflict (MTF-ELAC)” del dos municipio.
El MTF-ELAC amo el version del Sulu del “National Task Force to End Local Communist Armed Conflict (NTF-ELCAC)” del govierno nacional.
Asegun con el 11ID con el delaracion cay librao ya desde’l influencia del Abu Sayyaf, el municipio de Pandami y Siasi ay puede ya tene mga programa de desarollo y progreso.
Asegun con el Alcalde Nurhan Berto del Pandami cay bien cambiao ya ahora el provincia del Sulu hinde igual como de antes.
“Ta rindi came gracias con el mga soldao por el servicio de ila especialmente na mantencion de paz y orden. Poreso ta agradece came mucho canila,” asegun con Berto.
Myentras tanto, el Alcalde Ben-Sayeed Muksan del Siasi ya expresa su gratitude con el militar por mantener paz na de ila municipio.
“Este el dia que ta espera came, el declaracion cay librao ya el de amon lugar desde’l influencia del grupo Abu Sayyaf. Con el ayuda del mga soldao y cooperacion del mga vivientes de Siasi, puede ta came logra el cosa came ta desea,” asegin con Muksan.
So Major General Ignatius Patrimonio, el comandante del Joint Task Force (JTF)-Sulu y 11ID, ya comenda con mga oficiales del dos municipio cay ya puede ya sila adqueri el estado de librao desde’l influencia de grupo Abu Sayyaf.
Asegun con Patrimonio un indicacion lang ese cay efectivo el de ila campanya de paz y seguridad na provincia de Sulu.
(B. Garcia, photo courtesy of 11th Infantry Division)
