Dos man contratio familiares na provincial de Basilan pacificalmente ya termina de ila siete años playto siguiendo el mediacion ya inicia el 45th Infantry Battalion (IB), asegun con el militar del Domingo.
El playto que pacificalmente ya aregla amo el entre familiares de canda Omman Jaljalis y Abdulnasir Koy Aspali del Barangay Tumahubong, Sumisip, Basilan.
El ceremonia del acuerdo de paz ya hace del Miercoles na quartel del 45IB na Barangay Bohe Pahu, Ungkaya Pukan, Basilan.
Asegun con Tiniente Coronel Michael Colanta, el comandante del 45IB, ya toma parte el mga lideres del familia Jaljalis con 13 siguidores y Aspali con 12 miembros na proceso del resolucion de paz.
Asegun con Colanta, el peleya entre el dos familiares ya comensa del 2017 cuando ambos familia ya rendi un pusil de alta calibre na 64IB.
Peleya aserca si quien el dueño del pusil y desacuerdo financial ya resulta na mas animosidad entre el dos familiares, asegun con Colanta.
Del Abril 2021, ya tene sila un confrontacion que ya resulta na muerte del un pariente de Jaljalis, con quein ya cogi na acto tiene un relacion con el cuñada de Aspali na su residencia. El grupo de Jaljalis ya man balus que ya resulta na muerte del un pariente de Aspali.
Del Marso 2022, el mga parientes de Jaljalis ya destrosa con el gomahan de Aspali y un incidente de tiroteo ya socede na Barangay Upper Cabengbeng, Sumisip, que ya causa destroso na propieded pero nohay casualidad.
Del Julio 2022, otro atake ya ocuri que ya destrosa munco pono de goma del familia Aspali y del Enero 2023, mga parientes de Jajalis ya tira con el casa de Aspali.
Asegun con Colanta, con el resolucion de paz ya attended mga oficiales del municipio y policia del Ungkaya Pukan y Sumisip, y mga personajes ambos del 101st Infantry Brigade y 45IB.
Na su mensaje, si Brigadier General Alvin Luzon, el comandante de 101st Infantry Brigade, ya empatiza el importancia del resolucion de paz na mantencion de paz y istabilidad na provincial del Basilan. (B. Garcia)