Zamboanga: Un aguila ya recubri na ciudad de Dapitan

0
7
photo courtesy of DENR Zamboanga Peninsula

El Departamento de Medio Ambientes y Recursos Naturales o DENR, ya pone bajo’l rehabilitacion con el un aguila clasificao como un Pinsker’s Hawk Eagle na Regional Wildlife Rescue Center (RWRC) na Barangay Baklay, Tukuran, Zamboanga del Sur, asegun con el DENR del Domingo.

Asegun con el oficina regional del DENR, con el aguila ya salva el mga personajes del Oficina Comuniatria de Medio Ambientes y Recursos Naturales o CENRO del Piñan, Zamboanga del Norte, del otro semana na Barangay Sto. Niño, ciudad de Dapitan, na mismo provincia.

Asegun con el DENR, con el operacion de rescate ya conduci despues que el Protected Area Management Office (PAMO) del Barangay Talisay, ciudad de Dapitan ya recivi informacion aserca el posesion de un pajaro en peligro de extincion.

El mga personajes del CENRO-Piñan enseguidas ya coordina con mga oficiales del Barangay Sto. Niño, ciudad de Dapitan, para verifica con el informacion y ya salva con el aguila.

Si Señora Janessa Bucol, un concierne residente, ya informa con el mga personajes del CENRO-Piñan cay ya descubri le y su esposo con el aguila na un pugaran mientras ta saca sila leña na buug.

Asegun con del DENR, serca ya tres meses ta cuida con el aguila el man maridable antes que ya informa sila na mga autoridad el presencia del pajaro na de ila posesion.

Asegun con el DENR, el aguila hay esta bajo el cuidada na RWRC na Barangay Baklay, Tukuran, Zamboanga del Sur y ay larga con el pajaro si preparao ya este bira otravez na su habitat natural. (B. Garcia)

Leave a Reply