Dos miembros del Abu Sayyaf Group (ASG) el ya rendi na autoridad na provincia del Sulu, asegun con el militar del Viernes.
Asegun con el 4th Civil Relations Group (4CRG), el dos miembros del ASG ya rendi del Martes na quartel del Tactical Operations Group Sulu-Tawi-Tawi (TOG SulTaw) na Barangay Bus-Bus, Jolo, Sulu.
El 4CRG nohay mas nombra con el dos rendidores ASG de quien rendida ya facilita el Tactical Operations Wing Western Mindanao (TOW WestMin) por medio del TOG SulTaw en colaboracion con el otro mga unidades del militar y policia.
Asegun con el 4CRG, el dos rendidores ASG ya servi antes como mga personajes de inteligencia y oficial de seguridad del defunto lider del ASG si Ghalib Andang alias Comander Robot y con el defunto Mujib Susukan, ambos envuelto na infamoso incidente de sequestrada na Sipadan del Abril 23, 2000.
Ya servi tamen sila bajo na grupo de ASG sub-lider Idang Susukan, quien envuelto na serie de tirahan contra con mga soldao na tierras de interior del municipio del Talipao, Sulu.
Asegun con el 4CRG, el dos miembros del ASG ya decidi rendi despues de esconder por cuantos años para vivi un normal vida y entegra otravez na sociedad.
Asegun con el 4CRG, el dos miembros del ASG, ya entrega dos rifles Garand cando ta rendi sila na TOG SulTaw. (B. Garcia)