El mga autoridad ya puede aresta dos armao personas na un operacion de aplicacion de ley provincia del Maguindanao del Sur, asegun con el policia del Martes.
El Philippine National Police-Special Action Force (PNP-SAF) ya identifica con el dos arestao suspechao como canda alais Engel y alias Anayatin.
Asegun con el PNP-SAF, canda Engel y Anayatin ya aresta del Jueves ya pasa na Barangay Balanaken, Datu Piang, Maguindanao del Sur.
El policia ya habla, con Engel y Anayatin ya coge na lugar donde ya conduci sila un operacion de aplicacion de ley contra con el un lider del Grupo de Paglas, quien alegaomente suportador del Dawlah Islamia y Bangsamo Islamic Freedom Fight.
Nohas mas identifica el policia si quien el lider del Grupo de Paglas que el objetivo del operacion de aplicacion de ley.
Asegun con el policia, ya confisca desde na posesion de canda Engel y Anayatin un improvisado calibre 5.56 milimetro pistola, con mga bala del semehante calibre y bala de calibre .45 pistol, 12.21 gramos de suspechao shabu que tiene el valor de P103,428.
Asegun con el policia, ya detene canda Engel y Anayatin en preparacion para el plantada del caso contra canila por ilegal posesion de pusil, bala, y droga ilegal.
ASegun con el PNP-SAF, el operacion de aplicacion de ley ya conduci sila con el suporta del otro unidades del policia na Maguindanao del Sur. (B. Garcia)