Dos personas ya aresta myentras P945,000 cantidad de smuggled cigarillo el ya confisca mga otoridad na un operacion contra smuggling aqui na ciudad de Zamboamga.
Si Police Colonel Alexander Lorenzo, el Zamboanga City Police Office director, ya nombra con el dos arestao suspechao como canda Prince July Loon, 24, y si Misal Tan, 43 años el edad.
Asegun con Lorenzo cay con Loon y Tan ya aresta y con el smuggled cigarillo ya confisca mga alas 3:50 del Miyercoles aga na Barangay Culianan, este ciudad.
Base na investigacion, el maga pulis ta conduci checkpoint cuando ya ase sila para con un vehiculo ta maneja si Loon.
Durante el inspeccion, ya descubri mga pulis cay el vehiculo ta contene 27 cahon de diferente clase de cigarillo que tiene el valor de P945,000.
Asegun con Lorenzo cay ya aresta con Loon y con Tan y ya confisca con el mga cigarillo cuando ya falya sila presenta documento del de ila cargamento.
Con el dos arestao suspehao, mga contrabando y el vehiculo ya entrega ya na Buro de Aduana para el proprio disposision. (B. Garcia, photo courtesy of Zamboanga City Police Office)