Dos personas, incluido un antes official del barrio, el ya aresta y ya confisca P20.4 millones valor de droga ilegal el mga autoridad na un operacion contra droga na provincia del Sulu, asegun con un official del gobierno del Sabado.
Si Gil Cesario Castro, el director del Philippine Drug Enforcement Agency na Bangsamoro Autonomous Region in Muslim Mindanao (PDEA-BARMM), ya identifica con el dos arestao suspechao como canda Sherwin Talib, 39 años el edad y un antes barrio capitan, y si Sali Tating, 58 años el edad.
Un cohorte del dos arestao suspechao, identificao como si Wilnor Abduhalim, ya puede escapa despues que ya gole ele el presencia del mga operativas del gobierno.
Asegun con Castro, con el dos suspechao ya aresta na un operacion de compra busto mga alas 6 del Viernes tarde na Barangay Tulay, Jolo, Sulu.
Asegun con Castro, ya confisca na posesion del dos arestao suspechao tres kilos de suspechao shabu enpaquetao na tres boslo plastico con el valor de P20,400,000, dinero de compra busto, dos celpons, y varias tarjetas de identificacion.
Si Castro ya habla, con el dos arestao suspechao ya pone bajo’l custodia del policia na municipio del Jolo en preparacion para el plantada del caso contra canila por violacion del Ley Integral de Drogas Peligrosas de 2002.
Asegun con Castro, el exitoso operacion contra droga es el resulta del suporta ya extende con el PDEA-BARMM el diferente unidades del policia, y National Intelligence Coordinating Agency. (B. Garcia)