El 1st Infantry Division (1ID) ya celebra el promocion del cinco y dos nuevo designao oficiales y ya honra el exemplario servicio del su subjefe de personal para operaciones, asegun con el militar del Martes.
El 1ID ya habla, el celebracion ya hace del Lunes durante el solemno ceremonia de bandera na Campo Major Cesar Sang-an na Barangay Pulacan, Labangan, Zamboanga del Sur.
El mga nuevo promocionao oficiales ta inclui canda Capitan Janrey Remedios, Capitan Jonathan Baay, y Capitan Ryan Bartolome, con quien ya promiciona para na rango de Major.
Asegun con el 1ID, ya promociona tamen canda 1st Lieutenant Erlindo Dumayon y 1st Lieutenant Roselle Ballesteros para na rango de Capitan.
Asegun con el 1ID, el evento ya inclui tamen el simbolico ponida del Tabak Patch—un marca de inquebrantable dedicacion y servicio—con mga siguientes: Capitan Linef Paulo y Major Khadaffy Tawantawan.
Na un especial reconocimiento, el 1ID ya honra con Coronel Francisco Molina, el subjefe de personal para operaciones, por su excepcional liderato y experiencia operativo, que significamente ya avanza con el mision y objetivos estrategicos del division.
Si Brigadier General Antonio John Divinagracia, el interino comandante del 1ID, ya expresa su profundo apreciacion con el servicio excepcional de Molina y el impacto positivo del su liderato. (B. Garcia)