El 1st Field Artillery Battalion (1FAB) del Regimento de Atrilleria del Army, ya recivi el prestigioso Joint Task Force (JFT)-Zampelan Campaign Streamer Award por su servicio excepcional en proporcionar suporta de fuego artilleria na campaña del mando que ya contribui na desmantelada del Western Mindanao Regional Party Committee (WMRPC) del New People’s Army (NPA).
Asegun con el 4th Civil Relations Group (4CRG), el ceremonia de premiada ya conduci del Lunes na Kuta Major Cesar Sang-an, que ta servi como el casa de cuartel del 1st Infantry Division (1ID) na Barangay Upper Pulacan, Labangan, Zamboanga del Sur.
El ceremonia del premiada ya encabesa si Major General Gabriel Viray, III, el commandante del 1ID.
“El bandera del unidad del 1FAB tiene ya ahora el JTF-Zampelan Campaign Streamer Award, simbolizando el acomplicimientos del 1FAB y marcando un significante mojon,” el 4CRG ya habla na un anuncio.
Si Teniente Coronel Rojel Omictin, el comandante del 1FAB, ya descata cay el acomplicimiento hinde lang ta refleja con el actual trabajo del grupo pero ta atribui tamen con el antes comandante de batallon, de quien liderato ya hace fuerte fundacion.
El 1FAB ya celebra con el acomplicimiento con tradicional pelea de botin (boodle fight) na cuartel del batallon como el acto de gratitud por el trabajo y dedicacion del su mga personajes. (B. Garcia)