El 18th Infantry Battalion (IB) exitosamente ya puede aregla el peleya entre el familia de Halalin de Barangay Cabobo y familia Siddick de Barangay Baimbing na ciudad del Lamitan, provincia de Basilan, asegun con el militar del Jueves.
Asegun con el 18IB, el playto entre el dos familiares ya termina despues que ya firma sila un acuerdo de paz del Sabado na quartel del 18IB na Barangay Campo Uno, ciudad de Lamitan.
El areglo del peleya entre el dos familiares ya hace posible del unido esfuerzo de 1st Lieutenant Clanzy Mangliwan, el comandante del compania de bravo del 18IB; Noel Baul, el ejectuvo asistente del alcalde del ciudad de Lamitan; el barrio capitan Jasim Usmal del Barangay Baimbing; barrio capitan Andy Langkahan del Cabobo; Hadji Samad Ahaddin del Moro Islamic Liberation Front Coordinating Committee on the Cessation of Hostilities; y si Ibrahim Fernandez, un militia, quien ya actua como el contacto con el familia del defunto Muhsil Halalin.
El peleya entre el dos familiares ya comensa del Marso 16, 2024 cuando tiene quien ya mata con Mushil Halalin, un milicia, mientras ta maneja el victima motorciclo na camino de Cabobo-Parangbasak y na Sitio Panandakan Barangay Baimbing.
Ya crea tension el muerte de Halalin con quien ya mata dos personas muntao na un motorciclo poniendo na peligro de ila comunidades.
El mga pacificadores ya persevera y nunca ya rendi hasta ambos partidos na conflicto ya conforma tene un areglo.
Si Tiniente Coronel Mark Serapion Lagud, Jr., el comandante del 18IB, ya expresa cay el batallon firme comitido para continua el esfuerzo de dedicacion lleva paz na provincia.
Si Lagud ya habla, cay contodo corazon sila suporta mga iniciativo como el resolvida de conflicto local hasta todo asuntos paficalmente hay resolve. (B. Garcia)