El 18th Infantry Battalion (18IB), en asociacion con el Ministerio de Agricultura, Pescarieas y Reformas de Agrario o MAFAR, ya entrega un crucial programa de desarollo socio-economico na provincia de Basilan, asegun con el militar del Domingo.
Asegun con el 18IB, el beneficiarios del programa amo el comunidad del Moro National Liberation Front (MNLF) bajo liderato de Habirin Jalil na Barangay Lahi-Lahi, Tuburan, Basilan.
El formal entrego del barco de pesca, que ya hace del Viernes, ya supervisa el oficina del Alcalde Jabhet Kallahal del municipio de Tuburan, que ya representa si Noravane Kalantungan, el oficial municipal del MAFAR.
Si Major Julius Ian Maestrado, el official ejecutivo del 18IB hunto con otro mga oficiales y personajes del mando y miembros del comunidad del MNLF ya man testigo con el entrego del barco de pesca.
Antes el activdad, si Tiniente Coronel Mark Serapion Lagud Jr., el comandante del 18IB, ya visita de cortesia con Hanie Junuban, el director provincial del MAFAR.
El visitada ya resulta na entrego del segundo barco de pesca y ya tene discussion fructifero aserca si cosa hace na futuro que bien beneficial na comunidades afectao na conflicto, en particular, y el mga residentes de Basilan, en general.
Asegun con el 18IB, el esfuerzo colaborativo entre el Philippine Army, MAFAR, y comunidad del MNLF ta ejemplica un positivo aprochada na hacida de paz.
Por medio de invertir na bienestar economico del comunidad, el objetivos del programa para crea mas estable y prosperoso medio ambiente, fomentada un sentido de esperansa y sustenable paz y orden. (B. Garcia)