Ya man hunto na un exitoso campaña de donacion de sangre el 18th Infantry Battalion (18IB) y el Lamitan District Hospital (LDH) na provincia de Basilan, asegun con el militar del Jueves.
Asegun con el 18IB, el exitoso actividad ya conduci del Miercoles na LDH na Barangay Limo-ok, ciudad de Lamitan, Basilan.
Asegun con el 18IB, exitosamente ya colecta 35 unidades de sangre durante el evento.
Porcion del coleccion hay aloca para con mga tropas del 18IB, el momento hay necesita sila sangre, mientras el resto hay beneficia el publico en general.
El campaña de donacion de sangre es un regular iniciativa del 18IB y del LDH, con el objetivo beneficia ambos con el mga tropas y el vivientes de Basilan.
Si Teniente Coronel Mark Serapion Lagud, Jr., el comandante del 18IB y si Major Julius Ian Maestrado, el ejecutivo oficial del mencionao batallon amo el ya encabesa con el mga donantes de sangre este mes.
El campaña de donacion de sangre tiene el tema de “Dugo-yanihan: Dugo ng Bayani, Para sa Bayan.” (B. Garcia)