Un oficial de barangay y su esposo el ya iri na un incidente de tiroteo na provincia de Basilan amediante el implementacion del prohibicion de armas en el elecciones, asegun con el policia del Jueves.
Asegun con el policia, el incidente ya ocuri cuantos minutos despues de alas 9 del Miercoles denoche na Barangay Eastside, ciudad de Isabela, provincia de Basilan.
El policia ya identifica con el mga victimas como canda Rowena Repono, un kagawad del Barangay Eastside, y su esposo, si Dominick.
Asegun con el policia, muntao na motorciclo el man maridable de camino pa bolbida cuando ya tira canila el uno del dos desconocidos personas muntao na otro motorciclo.
Despues que ya tira con el mga victimas, el mga suspechao ya escapa para na direccion del Barangay Binuangan, ciudad de Isabela.
El policia ta continua de ila investigacion para determina el motivo y identifica con el mga suspechao del incidente.
El incidente ya socede amediante na implementacion del prohibicion de armas de fuego en el elecciones. (B. Garcia)