Ya salva el mga miliciano y pescador con 14 mga empleyado de gobierno y dos pulis cuando ya man baliscat de ila lancha rapida del Viernes na mar del isla barangay de Tumalutab, ciudad de Zamboanga.
El policia ya identifica con el mga salvao empleyado de gobierno como canda Angelique Catis, Airreen Atilano, Rolan Bantoto, Cristy Del Rosario, Arnold Amrille, Karen Boniao, Airizza Flores, Albert Ebol, Ma. Lahksmi Loon, Nikka Enopia, Calven Dela Gracia, y Deolito Baldiza y si Angie Centillas y Patricia Ann Soria, mga personajes del Departamento de Interior y Gobierno Local.
El dos salvao pulis amo canda Police Major Roland Arriola, Jr., y si Police Master Sergeant Reagan Gregorio.
Asegun con el policia, librao todo’l mga pasajeros fuera lang con aquellos quien ya sustene irida o contusion.
Base na investigacion, el grupo del gobierno y dos pulis ta viaja para na isla de Tumalutab mga alas 9:30 del Viernes aga para conduci evaluacion con mga isla barangay en relacion con el Sello de Buen Gobernancia Local para del Barangay.
Sin embargo, el mga pasajeros tiene que transferi para na diutay lancha que hay transporta canila para na pantalan de Tumalutab siendo el lancha rapida no puede pundia na canto’y aplaya cay hunas durante el hora ya llega sila na isla barangay.
Mientras ta tranferi para na diutay lancha, ya inclina el lancha rapida y ya man baliscat.
El mga miliciano y pescador, quien talla serca aquel tiempo del incidente, enseguidas ya salva con el mga pasajeros.
El grupo es uno del mga organizao grupos de evaluacion para visita y conduci evaluacion na diferentes barrios na ciudad el relacion con el Sello de Buen Gobernancia Local de Barangay, un evaluacion de actuacion y sistema de reconocimiento con el objetivo para dale distincion con mga barangay con notable actuacion na varias manera de gobernancia que ta encabesa el Departamento de Interior y Gobierno Local.
El mga personajes del 2nd Zamboanga City Mobile Force “Seaborne” Company (2ZCMFC) ya transporta con el mga meimbros de grupo del evaluacion para na de ila quartel na Barangay Baliwsan.
Con el mga miembros del grupo de evaluacion ya pone bajo’l evaluacion medical el grupo de repuesta de emergencia del City Disaster Risk Reduction and Management Office. (B. Garcia)