Sultan Kudarat – Kinahanglang e-report matud dayon ang gidudahang masakiton nga binuhing baboy ngadto sa municipal agriculturist o meat inspector para sa hinanaling aksyon.
Kini ang panawagan ni Sultan Kudarat Provincial Veterinarian Dr. Edwin Nacito ngadto sa mga magbababoy o adunay mga binuhing baboy sa kinatibuk-ang probinsiya.
Gihimo sa maong Opisyal ang naasoy nga panawagan human makompirmar ang mga kaso sa African Swine Fever o ASF sa mga barangay sa Lasak, Batangan, ug Telafas sa lungsod sa Columbio.
Matod niya ang mga kaso sa ASF gimonitor usab sa mga barangay sa Baras, Katungal, ug Kalandagan sa Tacurong City; D’Lotilla sa Isulan ug Daguma sa Bagumbayan.
Dugang ni Nacito nga ila usab nga gilubong ang mga nakumpiska nga baboy nga gibaligya sa Sitio Balisan, New Bantangan, Columbio tungod sa kahadlok sa ASF.
Sa Lambayong diin adunay gidudahang mga kaso, giihaw dayon sa mga hog raisers ang ilang mga binuhing baboy imbes nga motaho sa mga otoridad nga matod niya dili unta angayan.
Tungod niini, gitambagan ni Dr. Nacito ang mga hog raisers sa Sultan Kudarat nga mangayo ug disinfectant sa ilang municipal agriculture office ug mag-amping pa.
Nanawagan usab kini sa mga konsumidor nga dili mopalit og karne nga gidudahang gikan sa mga lugar nga adunay ASF. (Rem Agdon)