Oficialmente ya declara con el 13 del 40 barangay na municipio del Parang, Sulu como Zona Libre de Armas y Comunidad Centrada de Paz, asegun con el militar del Domingo.
Asegun con el 11th Infantry Division (11ID), el declaracion ya hace si Alcalde Alkhadar Loong durante un programa del Miercoles na sala del Barangay Saldang que ya organiza el 41st Infantry Battalion (41IB) bajo liderato de Tinienete Coronel Ray De Lima.
El mga barangay cubrido na declaracion amo el mga siguientes: Saldang; Bukid; Danapa; Linuho; Paugan; Piyahan; Kutah Sairap; Tikong; Laum Buwahan; Upper Sampunay; Lower Sampunay; Buli Bawang; y, el Wanni Pyanjihan.
Asegun con el 11ID, el mga oficiales del 13 barangays ya firma acuerdo para conserva el paz y privini el llevada de armas na de ila cada’y cual barrio.
Na su mensaje, si Brigadier General Mario Jacinto, el comandante del 1101st Infantry Brigade, ya rendi gracias con el mga gentes envuelto na exitoso declaracion de Zona Libre de Armas y Comunidad Centrada de Paz.
Si Jacinto ya habla, el clase de programa es un buen ejemplo para na desarollo del comunidad.
Asegun con el 11ID, con el programa de declaracion ya atende mga alto funccionarios del gobierno, policia, y militar. (B. Garcia)