Total de 123 aprendiz, compuesto del primer y segundo grupo, el ya completa el formacion de formadores para el implementacion na provincia del Zamboanga del Norte del programa de limpieza de drogas na barangay.
Asegun con Maharani Gadaoni-Tosoc, el director regional del Philippine Drug Enforcement Agency (PDEA), el dos-dia entreno ya conduci del otro semana na Neo Global, Glorious Fantasyland, Barangay Dawo, ciudad de Dapitan, Zamboanga del Norte.
Asegun con Gadaoni-Tosoc, el entreno tiene el objetivo enseña con mga participantes el necesario sabidoria y habilidades para implementa el programa de limpieza de drogas na barangay.
El mga aprendizes, compuesto de pulis, oficial de relaciones comunitarias, oficiales de municipios y ciudad y mga personas focales del consejo contra abuso de drogas, quine hay servi como mga multiplicadores de fuerza na implementacion del programa de limpieza de drogas na barangay na Zamboanga del Norte.
Asegun con Gadaoni-Tosoc, crucial el de ila papel para asegura el buen resulta del operaciones de limpieza de drogas na nivel del barangay, refuerzando con el iniciativa del gobierno contra droga.
Si Gadaoni-Tosoc ya expresa su gratitud con el Gobernadora Rosalina Jalosjos del Zamboanga del Norte quien ya patrocina y ya hace posible y exitoso con el actividad.
Ya rendi tamen si Gadaoni-Tosoc su gratitud con mga participantes quien ya accepta de ila invitacion y para servi como mga multiplicadores de fuerza para el efectivo implementacion del programa de limpieza de drogas na barangay. (B. Garcia)