El 11th Infantry Division (ID) ya instola un veterano official como el nuevo comandante del 11th Division Training School (DTS) na provincia de Sulu, asegun con el military del Sabado.
Instolao como el nuevo comandante de 11DTS amo si Tiniente Coronel Roy Dalumpines quien ya releva con Coronel Eugenio Baquiran.
Si Major General Ignatius Patrimonio, el comandante del 11ID and Joint Task Force (JTF)-Orion, amo el ya oficia con el ceremonia del cambio del mando na quartel del 11DTS del Miercoles na Campo Bud Datu, Barangay Tagbak, Indanan, Sulu.
Si Patrimonio ya regala con Baquiran el Medalla Merito Militar y Plaque de Reconocimiento por su invaluable servicio y inquebrantable esfuerzos como el comandante del 11DTS.
Si Baquiran ya expresa su gratitud con Patrimonio por el confiansa y confidencia ya dale conele para guia con el 11DTS.
Si Dalumpines ya expresa tamen gratitud con Patrimonio por su confiansa y confidencia que ya permiti conele para servi como el nuevo comandante del 11DTS.
Si Patrimonio ya alaba con Baquiran por su excelente liderato y ya diriji con Dalumpines para continua el mga buen acomplisimiento ya hace si Baquiran. (B. Garcia)