El mga escujido personajes del mga companias del 18th Infantry Battalion (IB) ya esta bajo el un dia entreno de Disaster Response Operations and Basic Live Support na ciudad de Lamitan City, provincia de Basilan, asegun con el militar del Sabado.
El entreno ya hace na quartel del 18IB na Barangay Campo Uno, ciudad de Lamitan City, Basilan del Jueves.
Asegun con el 18IB, un grupo desde’l Lamitan City Disaster Risk Reduction Management Office (CDRRMO) que ta encabesa si Oliver Torres amo el ya conduci con el entreno.
Durante el entreno, ya dale con el mga participantes corto pero comprehensivo orientacion de Disaster Risk Reduction Management (DRRM).
El orientacion ya sigue despues el detallado leturas con practical como el Philippine Risk Profile, Military Roles in Disaster, y Basic Standard First Aid y Basic Life Support.
Asegun con el 18IB, el entreno es parte del en curso de Sustained Warfighting Enhancement y programa de evaluacion del mga tropa, que ta agusa y prepara con mga soldao para efectivamente hace de ila mandato na combate y tambien na respondida na disastre y humanitaria.
Si Tiniente Coronel Mark Serapion Lagud, Jr., el comandante del 18IB, ya expresa su appreciacion por el suporta del CDRRMO na proporcionar de ila mga experto para ensenia el crucial informacion y capabilidades con mga participantes. (B. Garcia)