El mga oficiales y personajes del 11th Infantry Division (ID) ya hace un actividad de caminada del Miercoles na Bud Daho, Talipao, Sulu, asegun con el militar del Viernes.
Asegun con el 11ID, cientos de participantes desde’l varias unidades del mando ya sigue na caminada, que ya principia mga alas 6 del Miercoles aga na Barangay Buroh, Talipao, Sulu. El actividad ya conclui alas 9:30 de aga.
Asegun con Major General Ignatius Patrimonio, comandante del 11ID y Joint Task Force (JTF)-Orion, ya habla cay el actividad de caminada ta significa el mejorao situacion de seguridad na provincia de Sulu.
“Ya puede nosotros camina para na Bud Daho, que mentao antes como un campo de batalla y kuta del mga Abu Sayyaf por cuantos años. Ta demonstra este el triunfo na de aton campaña de paz y seguridad y el de aton colaboracion con el gobierno local, como ta experiencia paz relativo,” si Patrimonio ya habla.
Ademas, Asegun con Patrimonio, el evento ya dale oportunidad para conecta con el mga vivientes, quien ya expresa de ila gratitud para el mejorao paz y desarollo na de ila comunidades.
El monte historico del Bud Daho ta simboliza el resiliencia y resistencia del de aton kanunuan encontra con el fuerza estangero y servi como un recordada para honra con el de ila heroism. (B. Garcia)