El 11th Infantry Division (11ID) ya instola nuevo comandante para del 1103rd Infantry Brigade (1103Bde) na provincia del Sulu, asegun con el militar del Lunes.
Asegun con el 11ID, con Coronel Emmanuel Cabasan ya instola como el nuevo comandante del 1103Bde, y ele ya releva con Brigadier General Christopher Tampus.
Si Cabasan previamente ya servi como el jefe del estado mayor del mando unificado del Western Mindanao Command.
Si Brigadier General Leonardo Peña, el comandante del 11ID, ya encabesa con el ceremonia del cambio del mando que ya conduci del Sabado na cuartel del 1103Bde na Campo Bud Datu, Barangay Tagbak, Indanan, Sulu.
Despues del entrego del simbolo del mando, si Peña ya pone el rango de Brigadier General con Cabasan, simbolizando su bien merecido promocion y el confiansa ya dale conele el liderato del Fuerza Armada del Pilipinas.
Na su mensaje de despedida, si Tampus ya refleja na su mandato y ya expresa gratitud con mga oficiales, personal alistado, y civilian partes interesdas quien ya contibui na acomplicimientos del brigada.
Durante su discurso de suposicion, si Cabasan ya reconoce el responsibilidades del su nuevo designacion y ya compromete para sostene el ganancias ya adqueri bajo su predecesor.
Si Peña, na su comentarios, ya comenda con Tampus por su dedicacion y liderato, que significamente ya contribui na mejorao situacion de seguridad na provincia del Sulu.
Ya anima tamen si Peña con Cabasan para encabesa con el 1103Bde con integridad y determinacion. (B. Garcia)