Once miembros del Bangsamoro Islamic Freedom Fighters (BIFF) el ya rendi na autoridad na provincia del Norte Cotabato, asegun con el militar del Domingo.
Asegun con el 6th Infantry Division (6ID), el mga miembros del BIFF ya rendi con el mga tropas del 90th Infantry Battalion (90IB) del Jueves na Barangay Ladtingan, Pikit, Norte Cotabato.
Asegun con el 6ID, el once miembros del BIFF ya decidi rendi por causa del dificultad que ta experiencia sila mientras ta esconde con el mga soldao quien ta hace canila apas sin descanso.
El mga rendidores ya entrega mga armas de fuego de alta calibre que ta inclui un rifle M1-4, sinco rifles Garand, dos calibre .45 pistola, un rifle calibre .50, un M-203 launcher, un Rocket-Propelled Grenade launchers, mga bala y sinco Granada.
Si Tiniente Coronel Rowel Gavilanes, el comandante del 90IB, ya presenta con el mga rendidores con Brigadier General Donald Gumiran, comandante del 602nd Infantry Brigade.
Asegun con el 6ID, ya recivi inicial ayuda financial y arroz el mga rendidores desde con el mga oficiales local que ya atende con el programa donde ya presenta canila con Gumiran. (B. Garcia)