El Fuersa Armada del Pilipinas ya instola con Coronel Billy Dela Rosa como el neuvo comandante del 103rd Infantry Brigade base na Kampo Ranao, ciudad de Marawi.
Si Dela Rosa ya releva con Brigadier General Jose Maria Cuerpo, II, con quien ya designa como el nuevo deputy chief of staff for personnel del Fuersa Armada del Pilipinas.
El ceremonya na cambio na liderato del 103rd Infantry Brigade que ya encabesa si Brigadier General Antonio Nafarrete, comandante del 1st Infantry Division, ya ase del Domingo na quartel del mando na Kampo Ranao.
Si Nafarrete ya admira mucho con maga acomplisimiento y dedicacion de Cuerpo durante su mas de tres años turno como el comandante del 103rd Infantry Brigade.
El ceremonya na cambio na liderato del 103rd Infantry Brigade ya atende maga alto funccionaro y lideres del provincia del Lanao del Sur, military y pulisiya.
Si Nafarrete ya rindi su gratitude por el de ila suporta con el 103rd Infantry Brigade y ya apela tambien ele canila para continua suporta con el mando.
Myentrastanto, si Nafarrete ya expresa su confiansa hablando cay si Dela Rosa tiene el capabilidad para encabesa con el 103rd Infantry Brigade.
Si Dela Rosa ya sirvi antes como el 103rd Deputy Brigade commander y ele el inspector heneral del 1st Infantry Division del otro año. (B. Garcia, photo courtesy of 1st Infantry Division)