El 100th Infantry Battalion (100IB) base na municipio de Indanan na provincia del Sulu ya inicia cambio na lideratos del dos unidades del battalion, asegun con el militar del Sabado.
Asegun con el 100IB, el ceremonia del cambio de lideratos ya hace del Miercoles na unidades del Headquarters and Headquarters Company y Bravo Company del batallon.
El ceremonias na cambio de liderato del Headquarters and Headquarters Company ya conduci mga alas 10 del aga na Barangay Langpas, Indanan, Sulu y na liderato del Bravo Company mga alas dos del tarde na Barangay Timbangan del mencionao municpio.
Asegun con el 100IB, con First Lieutenant Jetram Taes ya designa como el nuevo comandante del Headquarters and Headquarters Company.
Si Taes ya releva con First Lieutenant Emmanuel Lazo, quien ya refleja su un año servicio caracterizado de unidad y exelencia.
El liderato de Lazo ya deja un marca indeleble, que ta motiva un espiritu de resiliencia y colaboracion entre el mga tropas.
Si Taes ya accepta con el posicion como el nuevo comandante del Headquarters and Headquarters Company con humildad y determinacion.
Asegun con el 100IB, con Lazo ya designa como el nuevo comandante del Bravo Company del mencionao batallon.
Si Lazo ya releva con First Lieutenant Mark Pangan, quien ya servi como el comandante del compania dentro de siete meses.
Si Tiniente Coronel Samuel Bayongasan, el comandante del 100IB ya encabesa con el dos significante ceremonias de cambio na lideratos del dos unidades que ya enfatiza el profesionalismo y dedicacion del mando. (B. Garcia)Â