Uno del ocho personas el ya iri cuando ya kema el pump boat que ta munta sila na provincia del Zamboanga del Sur.
Asegun con el Coast Guard District Southwestern Mindanao (CGDSWM) cay el incidente ya ocuri mga alas 6:06 del Miyercoles denoche serca na pantalan del Margosatubig, Zamboanga del Sur.
Nohay nombra el CGDSWM con el victima ya sufri kemadura na cuerpo hablando lang cay un de legal edad ya el persona.
Base na investigacion del CGDSWM cay el victima y su siete compañeros ta navega ya pa birada na Barangay Lenok, Lapuyan, Zamboanga del Sur cuando ya man aberiya el makina del de ila pump boat.
Asegun ya kema el pump boat despues que ya man backfire cuando ya precura punciuna con el makina.
El ocho personas, incluwido el irido victima, ya salta para na mar y ya salva canila mga personajes de guardia costal.
Con el irido victim ya lleva na Rural Health Unit del Margosatubig myentras con el siete otro pasajeros de pump boat ya entrega canila na de ila familya. (B. Garcia, photo courtesy of CGDSWM)