Un soldao y un pulis el ya muri myentras sies otro el ya iri na un tiroteo despues de un emboscada (ambush) na provincia de Basilan.
Asegun con el Western Mindanao Command (Westmincom) el tiroteo ya ocuri mga alas 3:45 del Sabado tarde na Barangay Ulitan, Ungkaya Pukan, Basilan.
El muerto soldao ya conose como si Private Marjohn Tenido del 64th Infantry Battalion y el muerto pulis si Patrolman Abdurafic Acalun del Ungkaya Pukan.
El Westmincom ya habla cay el mga tropa hunto con el Vice Alkalde Ahmadin Baharim Ungkaya Pukan y mga myembros del Joint Peace and Security Team (JPST) cuando ya man ambush canila na Barangy Ulitan.
Ya tene sinco munitos tiroteo despues que el mga soldao y pulis ya imbisti que ya resulta na muerte de Tenido. Si Acalun ya despidi myentras bajo el medicacion na uno del mga ospital aqui na ciudad del Zamboanga.
Asegun con el WEstmincom cay nohay pasa nada con el vice alcalde del Ungkaya Pukan.
Durante el incidente, el grupo de Baharim ta conduci inspeccion na Barangay Ulitan en preparacion para el conducida de un “community outreach program” na benedero dia de Biyernes.
Asegun con el Westmincom cay el acto de emboscada es un manifestacion cay el mga suspechao hinde ta respeta con el mga oficiales del govierno, militar y con de ila mga compoblano Basileños.
El Westmincom ya habla cay hinde descansa el mga soldao hasta ay puede conose y nuetralisa con el mga suspechao.
Ya dale tamen aseguramiento el Westmincom cay hinde sila tolera con el clase de incidente y ay trabaja sila mucho para privini con mga suspehao comete el clase de incidente.
El JPST es un “peacekeeping forces” compuesto de mga soldao, pulis y myembros del Moro Islamic Liberation Front (MILF).
Con el mga JPSTs ya organiza del 2014 como parte del comprihensivo acuerdo entre el govierno del pais y MILF.
El trabajo del JPSTs amo para mira con el proceso de paz y seguridad del Mindanao. Ya establisa con el JPST como parte del proceso de decommissionamento (decommission process) del mga activo myembros del MILF. (B. Garcia)