Un reincidente delincuente de droga ilegal el ya aresta otravez el mga autoridad despues que ya vende ele shabu con un agente del gobierno na provincia de Tawi-Tawi, asegun con el Philippine Drug Enforcement Agency (PDEA) del Domingo.
Asegun con Gil Cesario Castro, el director del PDEA na Bangsamoro Autonomous Region in Muslim Mindano (BARMM), con el arestao suspechao ya conoce como si Sibal Sampang conocido tamen como si Kim, 22 años el edad.
Asegun con Castro, con Sampang ya aresta na un operacion de compra busto na Barangay Poblacion, Bongao, Tawi-Tawi del Viernes.
Asegun con Castro, con Sampang enseguidas ya aresta despues que ya vende le shabu con un agente del PDEA quien ya pretende como un comprador de droga ilegal.
Si Castro ya habla, ya recubri na posesion de Sampang mas of menos 50 gramos de suspechao shabu enpaquetao na un sobrecito palstico que tiene el valor de P340,000, dinero de compra busto y orden de liberacion de custodia.
Asegun con Castro, ya aresta ya antes con Sampang por violacion del Comprehensive Dangerous Drugs Act of 2002 y ya larga conele del Septiembre 2023 na Bongao, Tawi-Tawi despues que ya man preso le na calaboso.
Si Castro ya habla, con Sampang ya aresta el mga agentes del PDEA-BARMM con el suporta del policia y militar. (B. Garcia)