El fuerza naval ya instola con el antes defensor del mar de Filipinas Occidental como el nuevo comandante del Naval Forces Western Mindanao (NFWM), asegun con el NFWM del Domingo.
Este ya vene despues que si Rear Admiral Donn Anthony Miraflor, quien ya servi como el comandante del NFWM por mas de un año y tres meses, ya retira ya desde’l servicio militar cay ya llega ya ele na edad de retiro obligatorio de 56 años el edad.
Asegun con el NFWM, ya instola con Commodore Francisco Tagamolila, Jr., como el nuevo comandante del NFWM subsiguiente con Miraflor, quien formalmente ya retira desde’l servicio militar.
Antes del su nuevo designacion, si Tagalolila ya queda parte del defensor del mar de Filipinas Occidental for sinco años servicio como el diputado comandante del Naval Forces West.
Si Vice Admiral Toribio Adaci, Jr., el Flag-Officer-in Command del fuerza naval, amo el ya encabesa con el ceremonia del cambio de mando y retiro que ya conduci na Naval Station Romulo Espaldon del Jueves.
Con Miraflor ya conferi el Philippine Legion of Honor (Degree of Officer) como un reconocimiento na su meritorioso excepcional y valuable servicio que ya rendi ele na posicion del un gran responsiblidad como comandante del NFWM desde Enero 19, 2023 hasta Mayo 9, 2024.
Si Adaci ya alaba con Miraflor como un reconocimiento na su exemplario actuacion na Fuerza Naval del Pilipinas, cay ya dale le mira prueba del su capabilidad y competencia innegable el liderar el equipo flota de marino na Mindanao occidental.
Si Miraflor es un producto del Philippine Military Academy (PMA) Sambisig Class of 1991 mientras si Tagamolila, un producto del PMA Tanglaw-Diwa Class of 1992. (B. Garcia)