Un pescador el ya muri meintras otro uno el nohay pasa nada na un incidente de tiroteo na mar del ciudad de Zamboanga, asegun con el policia local del Lunes.
Asegun con el policia local, el incidente ya ocuri mga alas 7:30 del Domingo denoche na mar del Barangay Patalon, ciudad de Zamboanga.
El policia ya nombra con el victima como si Rasid Tunay, 34 años el edad y un pescador quien residente del Barangay Labuan, ciudad de Zamboanga.
Asegun con el policia, nohay pasa nada con el compañero pescador de Tunay nombrao como si Abdurasid Pampag, 34 años el edad y residente tambien del Barangay Labuan.
Base na investigacion, ta pesca canda Tunay y Pampag cuando ya tira canila el un desconocido armao persona muntao na un grande barco de pesca.
Enseguidas si Pampag ya lleba con Tunay na hospital pero el doctor ya declara con el victima muerto apenas llega na facilidad medical.
El policia ta continua el investigacion para determina si cosa el motivo y si quien el suspechao del incidente. (B. Garcia)