El mga autoridad ya aresta na un operacion de aplicacion de ley con el uno del mga personas mas buscada na pais con P1.3 millon premio monetario para su aresto na provincia del Lanao del Sur, asegun con el policia del Lunes.
El Police Regional Office-Bangsamoro Autonomous Region (PRO-BAR) ya nombra con el arestao persona mas buscada como si Commander Wahad Gara, un armero asociado con el Moro Islamic Liberation Front (MILF).
Asegun con el PRO-BAR, con Gara ya aresta na un operacion de aplicacion de ley por medio de servi’r orden de aresto mga alas 11:45 del Sabado aga na Barangay Tuca, ciudad de Marawi, Lanao del Sur.
Asegun con el PRO-BAR, si Gara tiene pendiente orden de aresto por violacion del Articulo 324 (crimen envuelto destruccion) del Codigo Penal Revisado de Filipinas sin recomendao piansa que ya dale el un corte na ciudad de Iligan, Lanao del Norte del Agosoto 17, 2009.
Asegun con el policia, si Gara es un objetivo principal por su particpacion na ataque del MILF na Lanao del Norte del 2008 que ya resulta na muerte del nucho civilian y soldao, incluido ya si Tiniente Coronel Angelo Benitez, el antes oficial ejecutivo del 102nd Infantry Brigade.
Asegun con el policia, si Gara ya esta fugitivo muy buscado a pesar que absuelto le na mga asuntos de multiple matansa y frustrao matansa que ya planta contra conele.
Asegun con el PRO-BAR, el aresto de Gara es un significante pasos para mejora el paz y orden na Lanao del Sur y mga sercanos lugar.
Con Gara ya ponde bajo’l custodia del Criminal Investigation and Detection Group para el documentacion y propio disposicion. (B. Garcia)