El intensificao campaña del militar contra proliferacion de armas de fuego sin licensia na provincia de Tawi-Tawi ta continua tene buen resulta cay otro tres mga vivientes ya rindi na autoridad de ila mga pusil nuay licensia.
Si Brigadier General Romeo Racadio, el comandante del 2nd Marine Brigade, ya anuncia del Martes cay el tres civillan ya rindi de ila mga pusil y bala con el mga tropa del 212th Marine Company bajo mando del Marine Battalion Landing Team-12 del Viernes na Barangay Poblacion, Sitangkai, Tawi-Tawi.
Asegun con Racadio, el mga pusil que ya rindi sila ta consisti de tres riple Garand, un calibre .45 pistola y un riple KG9 y mga bala.
Nohay mas nombra si Racadio con el tres civillan quien ya rindi de ila mga pusil sin licensia hablando cay mga residentes sila del Sitio Ponduhan Pangutaran, Barangay South Larap, Sitangkai.
“Este acomplisimiento ta demonstra cay efectivo el conducida del mga dialogo para convinci con mga vivientes rindi de ila mga pusil sin licensia” asegun con Racadio.
Con el mga armas de fuego ya desposita na quartel del 212MC. (B. Garcia, photo courtesy of Western Mindanao Command, AFP Facebook page)