Un conocido personalidad de droga el ya muri y un espectador el ya iri mientras valor de P13.6 millon droga ilegal el ya confisca na un operacion contra droga na Sulu, asegun con el Philippine Drug Enforcement Agency (PDEA) del Lunes.
Si Gil Cesario Castro, el director regional del PDEA na Bangsamoro Autonomous Region in Muslim Mindanao (BARMM), ya identifica con el muerto personalidad de droga como si Pailan Sahali Jumali y el irido espectador como si Julpuri Sailabbi.
Si Castro ya habla, si Jumali ya corre para na un grupada de mga tianggeros despues que ya gole ele el llegada del mga operativas apenas completa el transaccion de droga ilegal na vicinidad del tiangge na Barangay Tanduh Bato, Luuk, Sulu del Sabado.
Asegun con Castro, ya tira con Jumali cuando ya rebata ele el pusil del un operativa despues que ya cogi conele siguiendo el un rato lagasan y ya iri si Sailabbi cuando ya tupa conele bala.
Asegun con Castro, ya lleva canila dos na hospital pero ya declara muerto el doctor con Jumali cuando ya llega na facilidad medical.
Con Sailabbi ya admiti na hospital para el tratamiento medical.
Si Castro ya habla, ya confisca el mga operativas dos transparente sobrecitos plastico que ta contene dos kilos de suspechao shabu que tiene el valor de P13.6 millon, dinero de compra busto, un celpon, y diferentes tarjetas de identificacion.
El operacion de compra busto ya conduci mga operativas del PDEA-BARMM con el suporta del policia, militar, guardia costera, y del National Intelligence Coordinating Agency. (B. Garcia)
