Un estudiante ya muri y 29 otro el ya iri despues ya accidenta el vehiculo de pasajero ta munta sila na municipio del Sibuco na provincia del Zamboanga del Norte, asegun con el pulisiya del Martes.
Asegun con Police Colonel Glenn Dulawan, el director del pulisiya na provincia del Zamboanga del Norte, el accidente ya ocuri mga alas 7:30 del Lunes denoche na Barangay Paniran, Sibuco.
Si Dulawan ya nombra con el estudiante ya muri como si Junerey Alas-as Ramos, 16 años el edad, un Grade 11 estudiante y residente del Barangay Paniran.
Asegun con Dulawan, con Ramos ya declara muerto el doctor cuando ya llega na Labuan General Hospital (LGH) na ciudad de Zamboanga.
Asegun con Dulawan, 18 otro mga victima el admitido na LGH myentras el otro 11 victima na Sibuco municipal hospital.
Si Dulawan ya habla onse otro mga pasajero el nohay pasa nada. Mayoriya del mga victima mga estudiante del Malayal National High School na Sibuco.
Base na investigacion cay el mga victima muntao na un jeep de pasajero y de camino pa bolbida cuando el ya accidenta sila.
Si Dulawan ya habla el chufer si Rey Oray, 40 años el edad, ya perde control con el manibela del vehiculo y ya man bangga na costao del camino myentras ta pasa na un pa abajada camino.
El mga victima ya cay na jeep por causa del fuersa cuando ya man bangga el jeep na costao del camino. (B. Garcia, photo courtesy of Sibuco Municipal Police Station)