Un chuffer de motorcyclo ya muri myentras de suyu ankas irido na un accidente vehicular na costa iste del ciudad de Zamboanga.
Asegun con police Major Benzar Bairulla, hefe del Zamboanga City Police Station 3, con el muerto ya conose como si Ricky Dela Calsada, 35, años el edad.
Con el irido victima ya conose como si Nelson Falcasantos, 44 años el edad. Ambos si Calsada y Falcasantos mga residentes de Barangay Bolong, este ciudad.
Asegun con Bairulla el accidente ya ocuri mga alas 11:50 Huwebes denoche na Maria Clara Lorenzo Lobregat Highway, Sitio Pamingitan, Barangay Bolong, este ciudad.
Base na investigacion, cay ta navega canda Calsada y Falcasantos para na Barangay Sangali cuando ya accidenta sila.
Mas del investigacion ta indica cay alegaomente ambos si Calsada y Falcasantos bajo el influencia de tomada durante el accidente. (B. Garcia, photo courtesy of Zamboanga City Police Station 3)