Cuatro rebelde New People’s Army (NPA), incluwido un lider, el ya rindi na fuersa militar na separao occasion na provincia del Sultan Kudarat, el Western Mindanao Command (Westmincom) ay anuncia del Huwebes.
Solamente con el lider lang del NPA quien ya rindi ya nombra el Westmincom. Ele amo si Ka Jake, comandante del Sub-Regional Operations Command Daguma del Far South Mindanao Region del NPA.
Asegun con el Westmincom cay si Ka Jake ya entrega un riple Armalite con el tropa del fuersa militar cuando ya rindi le na Barangay Lasak, Columbio, Sultan Kudarat.
Asegun con el Westmincom cay si Ka Jake ya deja con el de suyu grupo na Sitio Ibi, Barangay Lagubang, Senator Ninoy Aquino, Sultan Kudarat del Agosto 19.
Despues que ya sale le na grupo, ya negocia si Ka Jake con el mga soldao para el su librao rindida.
Asegun con Tiniente Heneral Roy Galido, el comandante del Westmincom, cay el rindida del un alto ranggo lider del NPA es un manifestacion cay pa tumbada ya el grupo del mga rebelde.
Nohay nombra el Westmincom con el otro tres rebelde NPA quien ya rindi con el mga tropa del 37th Infantry Battalion (IB) na Barangay Tibpuan, Lebak, Sultan Kudarat del Domingo.
El tres ya entrega tres mga armas de fuego de alta callibre cuando ya rindi sila.
El rindida del tres rebelde NPA es un resulta del intensificao campanya del 37IB, 1st Scout Ranger Battalion, 2nd Sultan Kudarat Provincial Mobile Force Company, y del Kalamansig Municipal Police Station.
(B. Garcia)
(Photo courtesy of 6th Infantry Division)
