Genral Santos City – Nunot sa pag-abli sa selebrasyon sa 25th TUNA FESTIVAL 2023 sa Gensan, opisyal sab nga i-abli karong adlawa ang NATIONAL TUNA CONGRESS.
Ang National Tuna Congress karong tuiga pagahimoon sa Trade Hall sa SM City General Santos, uban sa pag-abli sa trade exhibit ingon man sa mga plenaryo sa kongreso nga adunay mga diskusyon mahitungod sa lain-laing mga hilisgutan nga may kalabutan sa industriya sa tuna pinaagi sa mga eksperto.
Ang nasangpit nga kalihokan gipasiugdahan sa SOCCSKSARGEN Federation of Fishing and Allied Industries, Inc.(SFFAII) sa pakigtambayayong sa local government unit sa General Santos City (LGU Gensan). Kalakip niini ang Bureau of Fisheries and Aquatic Resources (BFAR), Department of Trade ug Industry (DTI), Philippine National Police Region 12, ug pribadong sektor sa local tuna industry. Ang National Tuna Congress karong tuiga adunay kinatibuk-ang gigahin nga budget nga P9 milyones Sumala sa SFFAII, ang kongreso karong tuiga nagtumong sa pagpukaw sa mga bag-ong ideya, pagpauswag sa panag-uban, ug pagmugna og mahikap nga mga solusyon nga adunay malungtarong positibo nga epekto sa kaugmaon sa pagpangisda sa tuna. Nagsunod kini sa tema nga “Pag-adjust sa mga Istratehiya nga Makatubag sa Pangkalibutanon nga mga Pagbag-o.” (Rem Agdon)