El mga autoridad ya confisca P340,000 valor de droga ilegal, ya aresta un objetivo de alto valor, o High-Value Target (HVT), y ya salva un menor de edad na un operacion contra droga na provincia del Sulu, asegun con el Philippine Drug Enforcement Agency (PDEA) del Martes.
Si Gil Cesario Castro, el director del PDEA na Bangsamoro Autonomous Region in Muslim Mindanao (BARMM), ya identifica con el arestao HVT como si alias Pans, 24 años el edad y residente de Barangay Asturias, Jolo, Sulu.
Si Castro nohay mas identifica con el salvao menor de edad, con quein ya entrega na custodia del Ministerio de Bienestar Social y Desarollo, o MSWD, na Jolo, Sulu.
Asegun con Castro, con Pan ya aresta na un operacion de compra busto del Lunes na un estacion de gasolina na Barangay Bilaan, Talipao, Sulu.
Asegun con Castro, ya confisca na posesion de Pans mas or menos 50 gramos de suspechao shabu enpaquetao na un termosellada transparente plastico sobrecito que tiene el valor de P340,000, dinero de compra busto, un celpon, un mochila, y un motorciclo.
Si Castro ya habla, detenido si Pans en preparacion para el plantada del asunto contra conele por violacion del Ley Integral de Drogas Peligrosas de 2002.
Asegun con Castro, el mga agentes del PDEA-BARMM ya conduci con el operacion de compra busto con el suporta del diferente unidades del policia y National Intelligence Coordinating Agency na BARMM. (B. Garcia)