Algun 868 ancianos indigentes desde’l municipio de Indanan provincia de Sulu el ya recivi de ila muy necesario pension social na cantidad de P6,000 desde con el Ministerio de Servicios Sociales y Desarollo, o MSSD.
Asegun con el MSSD, el suporta financial, cubriendo el pension de seis meses, hay ayuda canila cubri na necesidades diarias como medicina y comida.
El MSSD ya conduci el disitribucion del pension dentro de dos dias del otro semana na cancha cubierta y sala de sesiones del Barangay Pasil, Indanan.
Asegun con el MSSD, el iniciativa ta trata de proporcionar el muy necesita alivio financial con el mga vulnerable individuales ancianos, particularmente aquellos quien nohay regular ingreso o apoyo familiar.
Para asegura todo elegible ancianos recivi de ila ayuda, el MSSD na Indanan ya facilita tamen el casa-en-casa distribucion de pension para con aquellos enplastao na cama y inmovil beneficiarios en el lugar.
El programa de pension social es un nacional iniciativa ta implementa el MSSD na Bangsamoro Autonomous Region in Muslim Mindanao (BARMM).
El iniciativa ta proporciona estipendio mensual con mga mas desventajao ancianos.
Con el implementacion y todo suporta del BARMM, este vital programa ta proporciona un crucial red de seguridad para con el mga vulnerable ciudadanos mayores. (B. Garcia)