El mga autoridad ya aresta un high-value target (HVT) persona y ya confisca valor de P3.4 millon droga ilegal na un operacion contra droga na provincia del Lanao del Sur, asegun con el Philippine Drug Enforcement Agency (PDEA) del Jueves.
Asegun con Gil Cesario Castro, el director del PDEA na Bangsamoro Autonomous Region in Muslim Mindanao (BARMM), con el arestao HVT suspechao ya conoce como si Arham Hadji Omar Alim, conocido tamen como si Abol, 25 años el edad y residente del Barangay Dilusan, Maguing, Lanao del Sur.
Si Castro ya habla, con Alim ya aresta na un operacion de compra busto del Martes na Barangay Marawi Poblacion, ciudad de Marawi, Lanao del Sur.
Asegun con Castro, ya recubri na posesion de Alim 500 gramos de suspechao shabu enpaquetao na sinco transparente sobrecitos plastico que tiene el valor de P3.4 millon, dinero de compra busto, un portamoneda, diferentes clase de tarjetas de identificacion, un bolso bandolera, y un vehiculo utilitario deportivo.
Si Castro ya habla, ya detene con Alim na carcel del PDEA-BARMM en preparacion para el plantada del asunto contra conele por violacion del Comprehensive Dangerous Drugs Act of 2002.
Si Castro ya habla, con Alim ya aresta el mga agentes del PDEA-BARMM con el suporta del militar y policia, incluido el mga operativeas de inteligencia.
El confiscacion del Martes del P3.4 millon valor de droga ilegal y aresto del un HVT suspechao amo el segundo grande acomplisimiento del mga autoridad na region autonomo desde Mayo 1.
El de todo grande acomplisimiento amo el aresto del tres HVT suspechao y confiscacion del P13.1 millon valor de shabu na Datu Odin Sinsuat, Maguindanao del Norte, del Mayo 1. (B. Garcia)