Tres personas mas buscada el ya aresta el mga autoridad na separao operaciones de aplicacion de ley na Zamboanga Peninsula, asegun con el policia del Jueves.
Con el mga arestao ya conoce como el mga siguientes: Angelo Angeles Jumawan, el numero tres persona mas buscada na region; Demas Tating Abdula, el numero dos mas buscada; y, si Alsamer Tating Abdula, el numero uno persona mas buscada na region.
Asegun con Police Brigadier General Bowenn Joey Masauding, el director del mando regional del policia o Police Regional Office-9, con Jumawan ya aresta mga alas 2:50 del Martes tarde na Paseo del L. Alvarez, Barangay Talon-Talon, en este ciudad.
Si Masauding ya habla, si Jumawan tiene pendinete orden de aresto por el crimen de estatutorio abuso carnal sin recomendao piansa que ya dale el un corte del ciudad de Zamboanga del Mayo 13, 2024.
Asegun con Masauding, con Demas Abdula ya aresta mga alas 11 del Martes tarde na Barangay Matim, Olutanga, Zamboanga Sibugay.
Si Masauding ya habla, si Demas Abdula tiene pendiente orden de aresto por el crimen de matansa sin piansa que ya dale el un corte del ciudad de Zamboanga del Mayo 3, 2024.
Asegun con Masauding, con Alsamer Abdula ya aresta mga alas 9 del Martes denoche na Sitio Tinago, Barangay Poblacion, Talusan, Zamboanga Sibugay.
Asegun con Masauding, el Alsmer Abdula tiene pendiente orden de aresto por el crimen de matansa sin piansa que ya dale ael un corte del diudad de Zamboanga del May 3, 2024.
Todo el tres mga arestao personas mas buscada ya pone bajo’l custodia del Criminal Investigation and Detection Group para el propio disposicion. (B. Garcia)