Ya muri el uno del tres del mga suspechao na falyao robo con homicidio del Abril 29 na un incidente de tiro na ciudad de Lamitan, provincia de Basilan.
Myentrastanto, un 36 años mujer el ya iri cuando ya tupa conele un bala perdida durante el incidente de tiro que ya ocuri mga alas 8:45 Sabado aga na caretera del Barangay Limo-ok, ciudad de Lamitan.
Si Police Lt. Col. Arlan Delumpines, el hefe del pulisiya na ciudad de Lamitan, ya nombra con el muerto como si Hadi Harun, legal el edad y residente de Barangay Tablas Usew, Tuburan, Basilan.
El irido victima de bala perdida ya nombra si Delumpines como si Annie Tocmochan, un residente de Barangay Maloong San Jose, ciudad de Lamitan.
Base na investigacion cay antes del incidente, ta maneja motorsiclo si Harun y ta man cuento con el suspechao, quien ta maneja tamen su motorsiclo y ta corre sila dos alapar na camino.
Asegun na investigacion, derepente lang ya arangka pusil el suspechao y ya tira con Harun, quien ya puede pa arangka su pusil y ya empesa sopla de tiro pero nohay tupa con el suspechao.
Si Tocmochan, quien serka na lugar del incidente, ya iri cuando ya tupa conele un bala perdida. Admitido ahora si Tocmochan na hospital.
Cuando ya tumba si Harun na camino, ya abaja el suspechao na su motorsiclo, ya atraca y ya tira na cabesa con el victima.
El suspechao ya pipina con el calibre .45 pistola de Harun y despues ya escapa ya.
Asegun con Delumpines ya puede recubri na posesion de de Harun un bolo, y un clip de bala de calibre .45 pistola.
Si Delumpines ya habla cay si Harun uno del tres suspechao na incidente de falyao robo con homicidio del Abril 29, 2023 na Barangay Malinis, ciudad de Lamitan.
Un persona el ya muri y un negocianta ya iri durante el incidente del Abril 29, 2023. (B. Garcia, photo courtesy of Lamitan City Police Station)