Un conocido vendedor el ya aresta y ya confisca valor de P408,000 droga ilegal na un campaña contra droga na provincia del Lanao del Sur, asegun con el policia del Miercoles.
Si Police Colonel Robert Daculan, el director del policia na Lanao del Sur, ya nombra lang con el arestao suspechao como si alias Basher.
Asegun con Daculan, con Basher ya aresta na un operacion de compra busto mga alas 9:30 de Lunes denoche na Barangay Lilod, Ditsaan Ramain, Lanao del Sur.
Asegun con Daculan, ya confisca na posesion de Basher 60 gramos de suspechao shabu enpaquetao na 23 plastico sobrecitos que tiene el valor de P408,000, un tarjeta de identificacion, un transparente contenedor plastico, y dinero de compra busto.
Si Daculan ya habla, con Basher y mga evidencia ya pone bajo’l custodia na quartel del policia del provincia de Lanao del Sur para el documentacion y preparacion para el plantada del asunto contra con el arestao suspechao.
Asegun con Daculan, con Basher ya aresta el mga operativas del Provincial Drug Enforcement Unit con el suporta del mga personajes del policia del diferente mando na provincia del Lanao del Sur. (B. Garcia)
