Un persona el ya aresta y otro uno el ya puede escapa mientras valor de P6.8 millon droga ilegal el ya confisca na un campaña contra droga na provincia del Zamboanga Sibugay, asegun con el Philippine Drug Enforcement Agency (PDEA) del Lunes.
Asegun con Maharani Gadaoni-Tosoc, el director regional del PDEA, con el arestao suspechao ya conoce como si Hairy Ramos Baladji, 42 años el edad y residente del Barangay Bangkaw-Bangkaw, Naga, Zamboanga Sibugay.
El compañero de Baladji, si Ibrahim Amil, ya puede evita aresto.
Asegun con Gadaoni-Tosoc, con Baladji ya aresta na un operacion de compra busto mga alas 12:50 del Sabado tarde na Purok B, Barangay Poblacion, Kabasalan, Zamboanga Sibugay.
Asegun con Gadaoni-Tosoc, ya confisca na posesion de Baladji mas o menos un kilo de suspechao shabu que tiene el valor de P6.8 millon, un bolso bandolera, un celpon y un cargador, un bolso de ecologia, y un tarjeta de identificacion nacional.
Ya puede tamen recubri un balutan de boodle money que ya usa durante el operacion de compra busto contra con Baladji.
Asegun con Gadaoni-Tosoc, si Baladji hay enfrenta el asunto por violacion del Ley integral de drogas peligrosas de 2002. (B. Garcia)