Zamboanga: 1 arestao, P272,000 droga ya confisca

0
6
(Photo courtesy of PRO-BAR)

Un persona el ya aresta y valor de P272,000 de droga ilegal el ya confisca el mga autoridad na campaña contra droga na provincia del Lanao del Sur, asegun con el policia del Miercoles.

El Police Regional Office-Bangsamoro Autonomous Region (PRO-BAR), ya nombra lang con el arestao suspechao como si alias Kar, 47 años el edad y residente del Barangay Kalungunan, Pantar, Lanao del Norte.

Asegun con el PRO-BAR, con Kar ya aresta na un operacion de compra busto del Domingo na Barangay Mipaga, ciudad de Marawi, Lanao del Sur.

Asegun con el PRO-BAR, ya conduci el compra busto contra con Kar despues del cuantos dias vigilancia na su actividades relatao na bendida de droga ilegal.

Asegun con el policia, ya confisca na posesion de Kar 40 gramos de suspechao shabu que tiene el valor de P272,000, un real P500 ya usa como markao dinero y 48 pedaso de P1,000 boodle money.

Asegun con el policia, ya detene con Kar y hay planta caso contra conele por violacion del Ley integral de drogas peligrosas de 2002. (B. Garcia)

Leave a Reply