Nakaandam matod pa si General Santos City Mayor Ronnel Rivera nga bawion ang GCQ status sa siyudad, higayon nga adunay dakong pagkunhod sa daily Covid infections, una pa man ang June 30.
Matod pa ni City Administrator, Atty. Arnel Zapatos, gimando na sa amahan sa siyudad ang weekly assessment sa sitwasyon, partikular ang matala nga kaso sa virus infections ug ang recovery rate sa maong mga pasyente.
Anaa sa 560 ang active cases sa siyudad, base sa May 24 tracker bulletin sa Department of Health.
Una nang gipamahayag ni Rivera nga sa kasamtangan, labaw’ng kinahanglan sa GenSan ang mas istrikto pang pagpatuman sa health protocol aron masalba ang health capacity sa siyudad, nga dul-an na sa critical level.
Epektibo karong Martes, May 25, balik na sa general community quarantine status (GCQ) ang General Santos City.
Subay sa bagong Executive Order No. 25 ni Rivera, magpabilin pa gihapon ang tanang business ug economic activities sa siyudad, apan limitado na kini subay sa national guidelines.
Giawhag usab ang mga kompaniya nga magpatuman og “alternative work arrangements” sa ilahang mga empleyado.
Limitado usab sa “take-out and delivery” ang operasyon sa mga food establishments ug sarado ang mga malls, gawas sa mga groceries.
Hinuon, magpabiling normal ang biyahe sa mga pampublikong sakyanan, subay sa gitakdang guidelines sa LTFRB kabahin sa seating capacity ug “point-to-point travels”.
Magpabilin usab nga abli ang tanang mga essential establishments sama media company, dental clinic, veterinary clinic, mga banko ug uban pa.
Aminado si Mayor Rivera nga dili igo ang pagpatuman sa “stricter measures” sa siyudad, aron hingpit nga matapna ang pagkaylap sa Covid-19 infections.
Matod pa sa opisyal, sulod sa duha ka semana na nga pagpatuman sa “stay at home Sunday” policy ug uban pang health measures, halos wala kini epekto sa padayong pagsaka sa kaso sa Covid sa siyudad.
Inay, gikaalarma sa opisyal nga nagka-taas pa ang mga natakbuyan niini.
Molungtad ang GCQ measure taman June 30, 2021. (John Rey Somido)