General Santos City – Gipaklaro sa General Santos City government nga walay “hard lockdown” nga ipatuman sa siyudad, taliwala sa padayong pagsaka sa kaso sa Covid-19.
Gihimo sa City Public Information Office ang pamahayag taliwala sa mikalat sa social media kalabot sa matod pa mas istriktong lockdown measures nga ipatuman ning adlaw’ng Domingo, September 12.
Sa impormasyong gitunol ni CPIO head Rombel Catolico, gipasabot niini nga pabilin gihapon ang “no movement Sunday” sa siyudad, subay sa naunang gipagawas nga executive order ni City Mayor Ronnel Rivera.
“Sunday no movement lang po yan,” ang tipik sa pagpaklaro sa opisyal sa media.
Sa bahin ni City-IATF information officer Jed Reston, gipaklaro usab niini nga magpadayon ang implementasyon sa “regular” no movement Sunday sa siyudad.
“Regular Sunday lockdown lang.”
Base sa September 11 tracker bulletin sa Department of Health, anaa sa 1,046 ang aktibong pasyente sa Covid, lakip na ang 131 nga newly-reported patients.
Samtang, misaka usab sa 373 ang kinatibukang ihap sa mga nakabsan sa kinabuhi human matala ang duha nga bagong fatalities, nga gilangkuban sa 58 years old female ug 79 years old male patients.
Anaa sa 9,709 ang ihap sa mga naka-rekober lakip ang 55 nga new survivors.
