Dako ang panghinaut ni bise mayor Kikang Uy nga masolosyonan sa labing daling panahon ang problema sa African Swine Fever (ASF) nga nasinati sa dakbayan karong panahon.
Tinuod nga nakaapekto gayud kini sa livestock industry ilabina sa mga livestock products gikan sa karneng baboy apan kinahanglan nga matun-an pag-ayo ang mga lakang nga ipatuman pinaagi sa pagkonsiderar sa tanang mga sugyot sa lain laing sektor sa katilingban, pasabot sa bise mayor.
Matod niya nga dakong hagit sa dakbayan ang pagpatuman sa gikinahanglang mga lakang ilabina nga dali kaayo ang pagkaylap sa sakit gikan sa usa ka barangay paingon sa lima na ka barangay sulod lang sa pipila ka adlaw.
Mahinumduman nga gisugyot ang pagpalabang sa balaod nga magdili sa pagbyahe ug pagbalhin balhin sa mga baboy gikan sa usa ka infected barangay paingon sa laing barangay sa tinguha nga mapakgang ang pagkaylap sa sakit.
Apan, giingon nga dako kining suliran sa mga nagbuhi og mga baboy tungod kay makaapekto kini og dako sa ilang kapanginabuhian.
Usa kini sa angayang makonsiderar, ang kapanginabuhian sa tanan ug ang tinguha nga mapakgang ang pagkaylap pa sa sakit sa uban pang barangay, pamahayag ni bise mayor Kikang Uy.
(Sangguniang Panlungsod – CdeO)